في اطار ظاهرة التخنث الفكري اللي استفحل في تونس. الرجال رجعت تخمم باسلوب نسواني و بتقمص ادوار لا تحمل صفتها: المتخنث هو رجل لكن يتقمص دور امرأة: و هذاكة علاش تتسمى "تخنث فكري" .
مثال: شهر واحد اخر، و عادك بيها تجي "غسّالة النوادر" و بعد نعملو ارواحنا نهبطو في التصاور و فيضانات بينما؛ امريكاني مع غسّالة النوادر، يقرا حسابو...
كون راجل: تشري دار، ثبت في منڨع واد او لا. كيف تبني، علّي في الدار و اعمل بزايد ردم. كيف في بالك بالماء طلع زوز ميترو في بوسالم، ما تشريش دار في بوسالم.
موش بتخنث عاطفي "عجبتنا الدار تقتل قلنا نشريوها"، "قلنا نسكنوا بجنب خالتي جميلة، الونس باهي"، " اللون متاعها يهبل و بيت بانو فيها زوز شبابك"
التخنث من نوع: "يجب على البلدية جهر الاودية"، "النهضة ما عملت شي 10 سنين"، "سوف نكون لجنة لمحاسبة المسؤولين"، "يجب تحويل مجرى واد مجردة" لا يجب التعاطف معاها بعد 11 سنة ثورة و 15 عام فايسبوك و 16 عام تونيزياسات.
1. درس اخلاق: حافظ على نظافة الشط: اهانة للعاقل
يرحم والديه اللي عمل se désabonner في الفايبسبوك: رحمة كبيرة باش الواحد ما يكونش قطيع متاع واحد غبي.
كان تلاحظو: "ذكر" يهبط منشور في الفايسبوك 10 سنين لتالي يجيبلو 80 جام، توا بريمة كان جابلوا 4 جامات اغلبهم متاع تلحيس و من الاقارب. حتى "الاناثي" صعبت عليهم جيبان الجامات في الفايبسوك ، تبعثلها CC ما تجاوبش.
انا نفد من العباد اللي تهبط في مناشير متاع نظف الشط، من عام 2006 و انتي جاي.
ملخر، قلة تربية و اهانة لصديقك في الفايبسوك باش تهبط منشور مماثل.
علاش؟
هو فيبالو كون الحكاية قديمة و باش تبقى ديما ، و كون التوعية الفايسبوكية هي توعية حشوية، و بالرغم من ذلك عامل روحو يهبط.
اغلبية التوانسة تكره المحامين كره الاطباء و كره اساتذة الايتود: لكن تعمل روحها تتجاهل قيمة المحامي وقت يحلك مشالك القانونية باش ما تدخلش الحبس و ما تخالفش القانون.
مواطن 1 توعي في مواطن 2: المواطن 2 وقت يتقمص دور المتلقي، يعني المفعول به، déjà طيّح قدرو لانه رضى اشكون باش يعطيه دروس في حاجة بديهية اللي هي النظافة.
مانيش مطالب باش نسمع مواطن 1 و باش نتفاعل معاه من اصله.
1.1- تنظم حملة نظافة و تتقمص دور Initiative دون صفة جمعياتية:
قال اشنوة عمل تطوعي و سلوك حضاري
المحامي، اشنوة باش يقولك، باش يقولك كل شي مريڨل، الى ان ولد صغير "مكسوب امو" جا يشارك معاكم، ضربتو كرهبة، او لدغتو حنش! مات، في اطار حملة النظافة.
المحامي يعجبني في تخمامو اللي فيه برشة خبابل، يحطلك اي بشر خاين من باب الاحتياط، اي بشر ينجم يموت بعد ساعة او غدوة..
يعني لاعب فيها برنامج بطل و شعبوي باش انظفو السبخة متاع الحومة، تلبس قضية في عدم تامين و الاعلام و خبابل اخرى مع القضاء. الوقوف امام القضاء في الحالات هذه هو دخول في الخسارة.
2.1 - باش تعمل جمعية (للاسف مخي خامج يلزم تكون "حمص و زبيب") متاع نظافة او جمعية عمل تنموي
مثل خنڨة عيشة للمستقبل، امل خنڨة عيشة، تنمية خنڨة عيشة...
فيها حضور نسائي و حضور رجالي و يشاركو مختلف اطياف المجتمع في نظافة الحي. سامحني، ما نبعثش مرتي او امي او بنتي او اختي اطبّس تلم في الدبابز اللي هاززهم الريح و الساشيات بلاستيك و لو مع الجيران او اقاربنا او اولاد الحومة. صحيح فمة برشة عايلات تهبط "تعرض في السلعة في الجمعيات"، لكن انا ما نحبش.
باش تعمل قطيع للجمعية، يلزم يكون عندك واحد ثري يمول الجمعية؛ و يجيب الڨازوز و البقلاوة و الحلو. و شوف و شوف: لانه موش ساهل باش تلمد اعضاء جمعية، بالرغم كل واحدة تكون ذات خلفية تجمعية، او خوانجية، او ليبرالية الخ
3.1- باش تكري عباد اتنظف و تخلصهم من مكتوبك:
يعني باش تخدم عباد صفتهم "مقاولات حضائر". ماشي في بالك باش تخلص الراس ب 30 دينار. يبطى شوي. يخلص عليك الراس ب 60 دينار و ما يقولكش قداش باش يجيب خدامة.
يلزم اتنسق مع البلدية و مع السلطات، و تعمل عقد مع الشركة. و ليس تجيبهم هكاكة، عامل يومي. و كيف تضربو حنش في عملية التنظيف؟ اشكون باش يشيلها.
عندك 3 ملاين باش تمول نهار نظافة شواطئ (باش يحسبلك التركتور اللي معاهم و الساشيات الخ) و كل اسبوع يجب اعادة القيام بذلك
2. عقلية "تولد الكلبة و نعطيك جرو"
اتنجم تتحدث معايا للصباح، لكن في نهاية الامر، الحديث هو من نوع "تحبل الكلبة و نعطيك جرو"
تي ما هو المسؤولين في تونس كيما جماعة الكورة: يحلل و يفسر و هو تعطيه جمعية يطيحها للشرفي و لاعب فيها صيد بوڨلادة.
انا اي مسؤول او وزير سابق عامل روحو ينقد في عمل الوزير اللي مبعدو نستغرب علاش الشي اللي يقول فيه ما عملوش وقت اللي هو كان شادد الكرسي و في بالو بيه بالوقت هذاكة.
ترشح للانتخابات البلدية و اتاو نشوفوك اش تعمل مع المقاولين مع الحضائر مع الميزانية مع اولويات التنمية، مع سياسة البلاد: اي رئيس بلدية جديد، اول حاجة يعملها يوصل الكياس قدام باب دارو او يربط دارو بالمقهى المفضل متاعو او بدار انسابو الخ
3. صاحب دروس الاخلاق في النظافة = موش راجل: هاو علاش
اي واحد يعطي في دروس اخلاق في نظافة الشطوط هو "موش راجل". كان جات الحكاية في عام 2006 ل 2012 راهو قلنا فايبسوك يعمل وعي و كذا. ما تلقاش فرنسي او امريكي او بريطاني يلقى الدنيا موش نظيفة و يهبط تصاور متاع دروس اخلاق، لانه يعرف الصفة متاعو و كونها مهمة البلدية في تنظيف ذلك.
في اروبا، عندهم اسواق اسبوعية تترك نفس الاوساخ اللي في تونس. يجيوا بعدها البلدية تنظف البلاصة. بخلاف المهرجانات و الحفلات الموسيقية في الشوارع، موجودة برشة الاوساخ في اروبا و على الشطوط متاع نهر الراين وقت يعملو احتفالات، اما ينظفوا بعد الحفلة. في تونس، يعمل روحو بطل، و يحب يوعي العباد ما تطيشش باكو بيتزا في القاع،و اغلبية الجمهور في حالة سكر. تونسي عايش في اروبا، يحاول يوعي واحد في حفل هاردروك بالنظافة ما يستنى كان يقصوه طروف طروف.
التكرار في دروس الاخلاق اللي تعرفها موش باش تبدل شي هو ضرب من التخنث الفكري؛ التخنث الفكري اللي ما يجيب شي و ما يخرجش رجال، اما يخرج كمشة من البهبارة فالحين ينقدوا بالفارغ
إرسال تعليق