السلام عليكم
شباب ، اليوم حاجة هايلة عاملتها الحكومة ، اللي تخمم فيكم
اي نعم حكومتنا تقاوم السلوكيات المحفوفة بالمخاطر ، و الحاضر يعلم الغايب.
الحكاية تدوم من يوم 24 جوان إلى يوم 31 جويلية 2021، اي نعم 31 موش 32.
رابط استبيان
موش مهم عندك جمعية ، اكتب اللي تحب،
موش مهم تعرف اش معناها مقاومة
موش مهم تعرف اش معناها سلوكيات
موش مهم تعرف اش معناها المحفوفة
المهم هناك مخاطر و يلزمك تقاوم مع الحكومة ،
توّا جاء وقت التعمير ، من غير ستيلو بيڨ، و لا ريق باش تقلب الورقة، الحكومة عاملة رابط مالسماء، و لا يفيق بيه انس و لا جان ،السؤال الاول ساهل برشة:
1-ماذا تعرف عن السلوكيات المحفوفة بالمخاطر ؟
الاجابة ساهلة برشة ، تمشي للشيخ قوقل يقلك :
على عكس الأمراض الأخرى، فإن الأمراض التي تسببها هذه السلوكيات المحفوفة بالمخاطر تحدث، في نهاية المطاف، نتيجة القرارات التي يتخذها الأفراد، حتى ولو كانت تلك القرارات لها دوافع مركبة. فالفرد هو الذي يقرر ما إذا كان سيشعل سيجارة، أو يتعاطى المخدرات، أو يطلب مشروبات كحولية، أو يتناول وجبات سريعة، أو يمارس الجنس دون وقاية.
بعدها تعدى ديراكت للسؤال الثاني ، لأن الحكومة مستعجلة و باش تعمل لجنة علمية تدرس مخرجات الاستبيان ، و اذا عجبتهم النتائج فهناك امل باش يعاودوا استبيان آخر و يشوفوا يا هل ترى اللي شاركوا ما زالوا شاديين بصحيح في أقوالهم ام لا.
2-ما هي أسبابها حسب تقديرك
الاجابة ساهلة زادة ، ألصق الاجابة متاع السؤال الأول ، باش تسهال عملية الفرز على اللجنة الخاصة متاع الاستبيان
3- السؤال : ما هي آثارها؟
ما تقلقش روحك ، ديما نفس الاجابة
4- ماذا تقترح؟
هنا سيدي خويا ، يلزمك تخدم طاسة مخك ، على خاطر التونسي كي تسئله حاجة يقلك ، البلاد داخلة في حيط .
مالاخر اكتب حيط
ما تخافوش الموقع الحكومي يقلك انتهى الاستبيان يوم 17 جوان 2021 و تمت مقاومة السلوكيات المحفوفة بنجاح و كانت تونس الاولى عربيا و افريقيا في ذلك
.
شباب ، لو سمحتم ، حقًا، بعيدا عن مهاترات الحكومة ، ما هي هذه السلوكيات المحفوفة بالمخاطر ؟
هل مررتم بها؟
هل يجب مقاومتها ؟ كيف؟
ام هي فزاعة؟
هل هي تسبب أمراض ؟ أم هي تسبب محاكمات؟ ام هي تسبب ضياع؟ ام هي طريق للثروة؟
ماهي ظواهرها بالظبط!
إرسال تعليق