صباحكم بالخير,
اليوم حبيت محكي على موضوع يومي نعيش فيه في الخدمة. باهي يا سيدي القطاع العام و القطاع الخاص في تونس زوز قطاعات مختلفة و شبه متضادة و أنا بصفتي من جماعة القطاع الخاص بش نحكي على وضعيتي. باهي يا سيدي انت كموظف في شركة خاصة فإنك مطالب بمردود معين.تخدم في شركة أجنبية و يجيك عرفك و يقلك انت مطالب في النهار بX خدمة يلزمك تخرجها مع مراعاة الحالات الخاصة الي تنجم تتعطل فيه و هنا يقلك ماكش مطالب حتى بش تزيد بعد الوقت و أصلا مايحاسبكش على الوقت و الي يكمل خدمتو ينجم يروح. تو يقول القائل عرفك عاطيك شهرية و فرحان بX خدمة تخرجها انتي يوميا شنوة الي يخلي انسان يخدم 2X و 3X بل و الأدهى و الأمر يزيد بعد الوقت بش يخرج الدوبل و التريبل متاع زملائو...تقلي سيدي خويا بالك فما بريمات ؟ نقلك لا لأن النظام الداخلي متاع الشركة مايعطيش بريمات متاع مردودية يعني مايطالبوكش بسوايع زايدة و منغير بوانتاج تكمل خدمتك حتى في نصف نهار تنجم تروح أما فرنك مايزيدوهش كي تبات للصباح تخدم. المشكلة أنو كي تجي تحكي معاهم يقلك اي صحيح عندك الحق و منو غدوة يتصرف كيف العادة. العرف أجنبي و موش موجود بحذانا في تونس لكن يرى في اخر النهار أن فلان خدم x3 متاع زملائو لكنو مايراش أن فلان يجي 7 يروح ال7 مثلا. ياديني ماك كملت خدمتك شوف حياتك اخرج اتفرهد اقعد مع صحابك في بلاصة أنك تغلي على زملائك الخبز. الغريب أنو البروفيل الي كيما هكا منتشر برشة و موش واحد موش ثنين. الناس هاذم شنية أهدافهم و علاش يتصرفوا هكا؟ و هل أنو صادفتم النوعية هذي في خدمكم؟
Enregistrer un commentaire