✔️ الماينينغ-التعدين في تونس : المعدّات اللازمة + التكلفة + المصاريف و المداخيل ✔️

السلام عليكم

شباب ان شاء الله تكونو بخير و في صحة جيدة

كالعادة :
Better late than never

قبل ما نبدأ , هذه نقاط مهمّة أقراها خويا و أختي بالباهي :
1- التعدين قانونيّا في تونس : ليس ممنوع لا يوجد أي قانون في تونس يمنعه إلى حدّ هذه اللحظة من كتابة هذا الموضوع , ما يُشاع في كلّ مكان حول أنه ممنوع قانونيا و أنها تعتبر تجارة في عملة صعبة و غيره هو كلام لا معنى له و 'البيّنة على من إدّعى' , يعني إلّي عنده دليل قانوني ثابت و موقّع و رسمي يدلّنا عليه , غير هذا حديث زايد .
2- التعدين دينيّا : منيش شيخ و منحب ننقلّ حتى فتوى من حتّى شيخ في هذا الموضوع , تحب تعرف حلال أو حرام , حلّ غوغل و إبحث في عقلك و شوف الشيخ الي ترتاحله , لأنّه الحكاية فيها تفصيل كبير مش مجرّد"حلال او حرام"
3- هذا الموضوع هو تقني , تعليمي و تثقيفي لكلّ النّاس و ليس فيه أيّ إشهار لأيّ شركة أو شخص أبدا , و كان ذكرت شركة راهو من باب الذٍّكر و توضيح معلومة معيّنة فقط لا أكثر
4- الموضوع بش يكون طويل شويّة , لأنّك بش تتعلّم فيه كلّ شيء بالتفصيل إن شاء الله , ملّي تهز الفلوس بش تشري المعدّات حتّى لين تبدأ تجني في أرباح التعدين بنفسك
5- تو لي عندو كأس قهوة يحطّو بحذاه و يركّز , و لي عنده ورقة و ستيلو يجيبهم , و لي عنده فلوس يحضّرهم
إلّي عنده نفس يتبّعني للّخر و بقدرة الله تخرج فرحان عاللخر زادا

حكيت في 2 مواضيع فارطة على زوز مواضيع مهمّين للغاية في ما يخصّ التعدين ,نخليلك الروابط متاعهم خاتر بش تستحقهم في وسط نقاشنا اليوم :
نصائح مهمة في الماينينغ
هل التعدين يهلك الماتريال ؟

بعيدا على الرّسميّات المنهجيّة الركيكة تع التعبير الكتابي , عناوين الموضوع بش تكون :
1- تستاهل الحكاية ؟
2- بقدّاش نجّم نبدأ ؟
3- منين نشري الماتريال ؟
4- اناهو الماتريال تع التعدين لي لازمني نشريه ؟
5- أحكيلي شويّة على الفرق بين انواع الماتريال و الربح منه
6- نركّب وحدي الحاسوب والا نشريه حاضر ؟
7- أناهم التطبيقات لي نستعملهم للتعدين ؟
8- تعدين تجّار المخدّرات
9- كيفاه نركّح الــ Bios ؟
10- كيفاه نجبد الفلوس إلّي دخلتهم من التّعدين ؟
11- بالحقّ التعدين معادش فيه ربح ؟
12- قدّاش يستهلك ضو التعدين هذا ؟

1-تستاهل الحكاية ؟
إلى حدّ هذه اللحظة من كتابة هذا الموضوع , الحكاية تستاهل و فيها ربح مقبول على مدى قريب , لأنّه فما برشا عوامل مترابطة هي المتحكّم الرّسمي في إرتفاع و نزول العائد الرّبحي من التعدين.
العوامل هذه نجمو نختصروها في 3 أسباب رئيسيّة :

1-أ ارتفاع أو نزول ثمن العملات الرقميّة

2-ب ارتفاع او نزول ثمن الرسوم الخاصّة بالتحويلات في ال Blockchain
كلّ عمليّة تحويل عملات رقميّة فيها fees يلزم يتخلّص , يعني مش لوجه الله بش تحوّل العملات متاعك من موقع إلى موقع أو من محفظة إلا محفظة أخرى , هذا طبيعي و عادي جدّا
و تختلف رسوم التحويل هذه من موقع لآخر و من عملة لأخرى

3-ج ارتفاع او نزول الـ Difficulty
معندهاش مرادف واضح و مباشر بالعربية هي 'الصعوبة' , اما هكا مكش بش تفهم شيء منها ,باهي شنو معناها Difficulty ؟
بش تفهمها يلزمك تفهم أساس التعدين , اكتب على اليوتيوب :
How cryptocurrency works
What's the crypto mining

فهمت شنوة التعدين ؟ اذا تو بش نفسّرلك 'الصعوبة' , ببساطة 'الصعوبة' هذه هي المسؤولة على تنظيم عدد البلوكات الموجودة خلال مدّة زمنيّة معيّنة , كلّ ما يزداد عدد المعدّنين في العالم فإنّه 'الصعوبة' تزداد
مثلا , في عوض كلّ 5 دقائق يتحلّ أو يتوجد بلوك , تولّي كلّ 10 دقائق , هذا شمعناها ارتفاع او انخفاض الـ Difficulty
الحكاية هذه تتسبّب في نقص الربح الخاص بالمعدنين في نفس العملة بشكل متماثل , لأنّه تعدين الايثيريوم و تعدين البيتكوين مثلا , كلّ واحد ليه أرباحه بطريقة مختلفة . كيفاه ؟
بدى يسخن و يصعب الموضوع
تبّعني , الرّبح من التعدين يكون بزوز طرق , إمّا أنّك تكون طرف أوّل أو طرف ثاني , شنوة الكلام هذا ؟
طرف أوّل : يعني أنت تقوم بالتعدين عن طريق Pool خاصّة بيك و الي هوما موجودين على الانترنات طبعا و يلزم تشريها الـ Pool بش تنجم تستعملها
طرف ثاني : يعني انت تقوم بالتعدين عن طريق Pool يقدّمهالك الموقع إلّي تقوم بالتعدين من خلاله
شنو الفرق بيناتهم الزوز ؟
كي تكون أنت طرف أوّل و تشري الـ Pool الخاصّة بيك , فما امكانيّة أنّك تحلّ 'بلوك' , صحيح هي إمكانيّة ضعيفة ياسر , لكنّها حاجة ممكنة ياسر زادا أنّك تعملها , البلوك كي تحلّه تاخو مكافأة , مثلا تحل بلوك ايثيريوم تاخو عليه
3 ETH , يعني 3 كعبات إيثيريوم , كعبة الايثيريوم تو في الوقت الحالي سومها 1.920$ تقريبا , لكن كيما نعرفو السوم يتغيّر كل لحظة . ينجم يزيد كيما ينجّم ينقص. الـ Pool اسوامها تختلف حسب الكفاءة متاعها.
حلّيت بلوك تو , تاخو تو 3x1920=5760$ , مكافئة ليك , طبعا معاهم نسبة اخرى من الفلوس الي تتمثل في الرّسوم او ال'fees' الي صارو في Blockchain عبر البلوك هذاكا الكلّ , يعني بش تروّح بتفتوفة باهية .
كي تكون إنت طرف ثاني , الموقع إلّي تتعامل معاه و لي يوفّرلك ال Pool من عنده بش تعدّن بيها , يكافئك هو كلّ يوم بنسبة معيّنة من المرابيح لكن هو ياخذ ربح البلوك الكلّ كي يتحلّ مش أنت
يعني أنت فقط بش تكريلو الماتريال متاعك بش يعدّن بيه , ثم يخلّصك كلّ يوم و يومه , حسب العوامل لي حكيناهم في اوّل الموضوع

2- بقدّاش نجّم نبدأ ؟
مسألة الفلوس حسّاسة للغاية , لأنّه في النهاية هذا إستثمار , لكنّه إستثمار ربحه مهوش قريب , يعني فيه صبر و يلزمك تفهم "إنت فاش قاعد تعمل بالضبط".
كُنت و حكيت في موضوع "نصائح مهمّة في الماينينغ" :

1- فكرة انك بش تولي لاباس عليك من الماينينغ في تونس او في اي بلاد في العالم , راك تحلم و تحسب في حسابات غالطة , الناس الكبار لي تمايني ربحهم الاساسي مهوش من الماينينغ, انما من تداول أو تخزين العملات الي يمينيوها, بالطبيعة بعد ما يرجعو اسوام الماكينات متاعهم .

2- الفلوس لي بش تجيبهم من الماينينغ ما تجريش تبيعهم و تقبض بالدينار التعيس , إلا إذا كان حاجة اكيدة مثلا بش تخلص حق المكينة لي تسلفته او خلاص الكهرباء او اي حاجة تشوف انها مهمة ياسر و لازمها تخلص.

يلزمك تقراه الموضوع بش تفهم الأساسيّات و ميمشيش فيبالك بش تولّي مليونير بين ليلة و ضحاها

نصيحة لله , ما تستثمرش في المشروع هذا فلوس أنت مكش مستعدّ تخسرهم , أو على الأقلّ فلوس مهمش متاعك او متسلّفهم , إلاّ لو كنت في حالة اجتماعيّة جيّدة مع الانسان لي سلفك و تعرفه و تاثق فيه يصبر عليك بالحق .
يلزمك تقرا حساب كلّ شيء , رغم الربح 99% مضمون , لكن هذا يرجع لتعاملك مع الموضوع بصبر و وعي و تعلّم و حسن تصرّف و تريّث و فهمك لشنو قاعد تعمل بالضبط . وفّر هاذم قبل الفلوس .
نجيو للفلوس , , كبداية يلزمك تعرف أنّه أسوام الماتريال حاليا هي مرتفعة نسبيّا على الحال الطبيعي ليها , نظرا للنقص الكبير الحاصل في العالم الكلّ , اكتب على اليوتيوب :
why are pc parts so expensive
تو تلقا برشا أجوبة تبّع برشا منهم تو تتشكّل عندك فكرة شاملة خاتر مش هذا الموضوع بش نفسّر فيه سبب الغلاء بالتفصيل , باختصار شديد , كورونا و مخلّفاتها على الشركات و المصانع و المعدّات و المواد الأوّليّة , وشويّة جوع تع تجّار , الخبر الجميل أنّه الاسعار بدات تنخفض بشكل ملحوظ في الاسابيع الاخيرة .
نجيو تو بالحق للفلوس , فدّدتك على حكاية الفلوس مش هكّا
مبلغ ما يقلّش على 4 ملاين , هو لي نحطّوه على الطّاولة للإستثمار كبداية و كمرحلة أولى , لو فمّا إضافات بعد مدّة لزيادة المدخول , فماهيش بش تقلّ على 2-5 ملاين للاضافة الواحدة.
أغلى قطعة في الماتريال إلّي بش تستعمله هي بالطبع الـ Graphic Card

3- منين نشري الماتريال ؟
هاذم بعض أسماء الشركات الي تبيع الهاردوير في تونس , انت تبحث و تشوف الي يساعدك و يناسبك .
نعاود , أبحث مليح و كلّم و إسأل قبل ما تشري حتّى شيء .

MegaPC - Skymil informatique - SBS Informatique - Extreme gaming - BigShop - Tunisianet - Mytek - Wiki - Technopro - Pebas - BestBuy Tunisie - Mediavision - QmaxTrading

هاذم لي نتذكّرهم على الأقل تو ,فمّا أخرين ربما نسيتهم
يعني مسألة الشراء في حد ذاتها عادي تاخو منك اسبوع او اكثر و انت تبحث و تسأل و تثبّت , مهيش بالسهولة لي تتوقّعها , علاش هذا الكلّ ؟
هذا الكلّ بش تعمل Optimisation maximal du prix d'investissement
بش تدفع أقلّ ما يمكن كبداية في الإستثمار هذا , و من قوانين البزنس في العالم أنّك تستثمر بأقلّ مبلغ ممكن كبداية , ثم بعد جني أوّل الارباح تنجّم تحسّن في الاستثمار بمبلغ محترم .

4- اناهو الماتريال تع التعدين لي لازمني نشريه ؟
حكيت في برشا تفاصيل على الماتريال في موضوع نصائح مهمة في الماينينغ , و كتبت برشا نصائح و توجيهات مهمين على الماتريال . مهمّ جدّا أنّك تقراهم الكلّ بش تفهم الكلام الجاي.
نبداو بأهمّ قطعة و لي هي بش تعمللنا عمليّة التعدين بشكل كامل , ال Graphic Card
زوز شركات مصنّعة لل Cores , و برشا شركات تركّب باقي مكوّنات الكارطة ,
الزوز شركات : Nvidia / AMD

البرشا شركات : MSI / Gigabyte / Palit / Asrock / PNY / ZOTAC / Sapphire ....

اناهو خير و شنو نشري ؟
بالنسبة لـ Nvidia / AMD

ما فمّاش شركة خير من الاخرى , فما غرافيك كارد الـ profitability متاعهم خير من غرافيك كارد اخرين , يلزمك تخمم هكا, مستثمر صغير و واعي مش مجرد واحد يحط في فلوسه في الهواء
بالنسبة لـ'برشا شركات' ,
كلّ شركة عندها الايجابيّات و السلبيّات , مهمش مهمّين في موضوعنا هذا و مش بش يأثرو على التعدين متاعك بشكل عامّ ,على الاقل كمبتدئ .
يعني المودال لي تختاره , كي تلقا سومه مناسب لجيبك , تشريه
الغرافيك كارد : القديم لا , الي عمره اكثر من عامين , ميسالش لكن ما ننصحش بيه , الي عمره عام او اقل , هو لي لازم تشريه
علاش القديم لا ؟
في الموقع هذا بش تلقا الليسته كاملة متع الغرافيك كارد الي مازالو صالحين للتعدين حاليّا , و المرابيح منهم :
What to mine

شفتهم اكا لي في 'أسفل الترتيب' كيما يقولو المعلقين الرياضيين التوانسة , رد بالك حتى تخمم تلوّج عليهم , يفيدو في الالعاب اي , اما مهمش للتعدين حتى لو قاعدين يجيبو في مدخول.
قبل ما نقلك شنو تشري , يلزم تفهم انه كلّ غرافيك كارد عندها عمر افتراضي للتعدين , الي هو في العادة ميفوتش ال 6 سنوات , منحكيش على الكارطة قداش تخدمك , نحكي على المودال و سنة الاصدار متاعه.
كيف ال GTX 1050TI , قريبا ماعادش بش تكون صالحة للتعدين .
لهذا قلت في البداية , القديم لا.
الليسته تع الغرافيك كارد شوفها و شوف الاسعار متاعها في السوق التونسيّة , ثم خوذ منها الي تلقاه على قد جيبك , و مننصحكش ابدا تاخذ حاجة اقل من rx60.. / rtx30..
هاذم آخر بطاقات هبطو في العالم , بش يداومو معاك مدّة باهية لو استحفظت عليهم , بش ترجع سومهم و اكثر بياسر بإذن الله
معلومة :
آخر بطاقات هبطتهم Nvidia في العالم , الكلهم LHR , يعني Low Hash Rate كيف 3070TI/3080TI/3060 و حتى الـ 3070/3080 الجدد نفس الشيء , لكن مازالو يعطيو نتائج مقبولة نوعا ما.
Low Hash Rate : يعني ال profitability متاعهم اضعف من النسخ الاولى منهم , شركة Nvidia ظهرلها بش تطيّح في انتاجيّة النسخ الجديدة من البطاقات هاذم لأسباب مختلفة , تلقاهم على غوغل.
لهذا , لو انت بش تاخذ احدى بطاقات rtx30.. فيلزمك تشوف حاجة من الجيل الاولى لي جاء لتونس , يعني اي حاجة Nvidia دخلت لتونس بعد شهر جوان 2021 راهي LHR
او كان ميقلقكش انو الانتاجية بش تكون ضعيفة شوي , خوذ لي تراه مناسب ليك .
او تاخذ مباشرة AMD RX 6700/6800/6800XT/6900 حسب امكانياتك , مفيهمش حتى بطاقة LHR, هذا المميّز في AMD

كيفاه تو , القهوة كمّلتها و كرومتك وجعاتك من القعدة ؟ أي امشي جيب قهوة أخرى و تحرّك شوي , أما ما تبطاش مازلنا راكشين

مشيت لأوّل بوتيك و شريت بطاقة AMD RX 6700 , مبلغ قيمته 2700 د

نمشيو ناخذو تو الماذربورد :
كبداية يلزم تفهم أنّه أي ماذربورد (كارت مار) من ماركة و مودال مقبول راهي تخدمك و مكش بش تلقا معاها مشكلة , يعني متجيبش كارت مار من واحد يصلّح الحواسيب منحيها من حاسوب dell قديم و تحب تميني بيها
هكا راك تغلط
الماذربورد يلزم يكون فيها على الاقل منفذ PCIe , كيف لي في الصورة

اي واحد فيهم متوفّر في الماذربورد لي شريتها راهو يخدمك , لكن احنا مش بش نشريو ماذربورد فيها منفذ واحد , اقل شيء فيها 3-12 منافذ خاتر نفكرو في التطوير و اضافة غرافيك كارد اخرين ديما.
MSI H310M PRO-VDH PLUS , كارت مار سومها تقريبا 200د , عاديّة جدّا و فيها 3 منافذ PCIe , يعني لو حبينا نطورو فهي تقبل 3 غرافيك كارد كحد أقصى.
أو
AFOX B250 سومها تقريبا 360 د ,لكن فيها 12 منفذ PCIe , مشكلتها انه مش متوفرة برشا في تونس , اما تلقاها اكيد لو تبحث مليح

نمشيو نشريو البروسيسور تو :
كل ماذربورد فيها socket مخصص لمودال معين من البروسور , اولا : اما AMD OU Intel

تنجم تعمل بحث بش تفهم شنو الفرق بيناتهم خاتر مش موضوعنا , المهم أنّك البروسيسور بش تشريه حسب مودال السوكيت تع الماذربورد متاعك
كيفاه تعرف البروسيسور المناسب للسوكيت متاعك ؟ تحل غوغل , تكتب اسم الماذربور كامل , و تكتب معاه compatible CPU
مثلا : AFOX B250 compatible cpu , و تدخل للموقع الرسمي تع الماذربورد
او تكتب مباشرة اسم البروسيسور , و تكتب معاه compatible socket
بصفة عامّة , المعدنين يستعملو في بروسيسورات انتل , ارخص في الثمن في الوقت الحالي و اقل استهلاك للكهرباء , و اهمهم Celeron/Pentium , اي اي ما يمشيش فيبالك التعدين لازمو i5/i7 راك تغلط هههه
لهذا قلنا متطلبات التعدين مختلفة تماما على الالعاب و التصميم

ناخذو مثال البروسيسور PENTIUM GOLD G5400 الي يخدم على الماذربورد لي ذكرناهم
سومه تقريبا 260 د

نتعداو نشريو الرامات :
الرامات قبل ما تشري, ببساطة يلزمك تثبت في مودال الرامات و التردد الي تدعمه الماذربورد متاعك , لي في حالتنا احنا مثلا الماذربورد الزوز يدعمو نفس المودال و التردد تع الرامات :
DDR4 / 2133/2400/2666Mhz و الي موجودين في السوق بكثرة , 4go/8go الاختيار يرجعلك , لكن دايما نخيرو ال 8
8 Go بفريكونس 2400 Mhz مثلا , سومها 140د تقريبا

نتعداو للديسك , بدون تفكير والا بحث كبير , خوذ 256 او حتى SSD 120Go كان لقيته .
الماركات المنصوح بيها : Adata / TeamGroup/ SP / WD
سومه بش يكون تقريبا 110د

نتعداو للبواتيي , الاختيار متاعهم يختلف حسب حجم الماذربورد و الغرافيك كارد متاعك , لو الماذربورد ATX يلزمها بواتيي كبيرة , لو MINI ATX-MICRO ATX فأي بواتيي ممكن تخدمك
لو بش تحط الكارطة في وسط البواتيي مكش بش تلقا قلقل لو الكارطة قياسات عرضها اقل من البواتيي , و هذا في اغلب الاحوال الي بش يصير
يعني باختصار خوذ البواتيي الي تعجبك , المهم ميفوتش سومها 120د , لانه اكثر من هكا بش تولي مصروف ملوش لازمة .
(حبيت نحط صورة توضيحيّة غير ممكن اكثر من 10 ملفات في نفس الموضوع)

الشاشة , اي شاشة تخدمك حتى مستعملة مش مهم , المهم فيها منفذ HDMI , نحطولها كثمن 300د كأقصى تقدير

نتعداو لآخر و أهم حاجة بعد الغرافيك كارد , الي هي ال PSU , Power Supply
تبع الموضوع هذا بش تفهم الفرق بين تصنيف الباور و تعرف الحاجة المناسبة ليك .
تعرف على شهادة 80+ لعلبة تغذية الطاقة للحاسوب
الماركات المنصوح بيها :
Cooler Master / Corsair / ASUS / Gigabyte
التصنيف المنصوح به : 80Bronze / 80Gold
Recommended wattage : حل غوغل و اكتب الكلمتين هاكم معاهم مودال الغرافيك كارد الي بش تشريها , مثلا في حالتنا نكتبو
recommended wattage rx6700 , نلقاو يعطينا 600w , احنا بالطبع بش نزيدو 150 و ناخذو 750w او اكثر , انت و فلوسك بالطبع ,لأننا نخممو في غرافيك كارد ثانية و ثالثة مستقبلا , الباور مش حاجة تتبدل كل يوم.
يكون شراءها من البداية بماركة ممتازة و كفاءة عالية خاترها حاجة حسّاسة للغاية .
750W 80+ Bronze سومها تقريبا 250د

اي هات نحسبو شنو شرينا و قداش طلعت الحسبة ؟

2700+360+260+140+110+120+250+300 = 4240د
تحب تقتصد , اي اقتصاد في القطع مش بش يكون حل , الاقتصاد الوحيد المؤثّر هو تغيير الغرافيك كارد , وقتها يطيح السوم او يطلع بنسبة ملحوظة , و كيما قلت , انت و جيبك.

5-أحكيلي شويّة على الفرق بين انواع الماتريال و الربح منه
هنا تلقا الجواب :
نصائح مهمّة في الماينينغ

6- نركّب وحدي الحاسوب والا نشريه حاضر ؟
لو متحبّش تخاطر و الفلوس متلقلكش كان جات زايدة شوي , اشري حاضر , ربما تلقا عندهم قطايع لي حاشتك بيهم الكل و ربما لا
لو تحبّ تستمتع بالتجربة الكلّ و تربح فلوس في جيبك كي تختار القطع حسب السوم لي يناسبك , اشري و ركب وحدك , العمليّة سهلة و بسيطة و يكفي فيديو من اليوتيوب يعلّمك كلّ شيء بالتفصيل
How to build a PC و تو تشوف الخير و البركة

7- أناهم التطبيقات لي نستعملهم للتعدين ؟
قبل التطبيقات فما المواقع الي توفّر التطبيقات الي هي عبارة على Pool ,
المواقع هذه هي :
Honeyminer / Nicehash / Cudo Miner / Kryptex / BetterHash / MinerGate / Awsome Miner و غيرهم ياااسر
منيش بش نوجّه أو ننصح بحتّى موقع , بش ميعدوهاليش المسؤولين في المنتدى , 'ترويج'
الكلهم مواقع موثوقة طبعا و معروفة في المجال و يوفرولك Wallet و جوك احلى جو

شريت الحاسوب و ركبته و يخدم , سجل في الموقع الي لقيته مناسب , اعمل توثيق للحساب متاعك لو طلبو منك توثيق بالباسبور او اي وثيقة ID رسمية
ثم تيليشرجي تطبيق ال Pool و توكّل على الله .
قبل ما تعمل هذا الكلّ يلزمك تفهم حاجة , الغرافيك كارد في الحالة العادية للتعدين و بدون كسر سرعة , بش تتسببلك في استهلاك كبير للكهرباء مع الحصول على مدخول عادي , لهذا يلزمك تعمل ال Overclocking
بيه هو بش تتحصّل على اقصى مدخول ممكن من الغرافيك كارد لي عندك و على استهلاك ضعيف للكهرباء , يعني انت بش تزيد الربح و تنقص الخسارة باختصار.
بالنسبة للغرافيك كارد AMD , عندهم تطبيقهم الخاص بيهم اسمه Radeon Software AMD
و بالنسبة لغرافيك كارد Nvidia , عندك تطبيق MSI Afterburner سهل و بسيط جدا في الاستعمال
بش تعرف كيفاش تعمل Overclock للغرافيك كارد متاعك , حل اليوتيوب , اكتب مودال الغرافيك كارد متاعك + Undervolt mining
في حالتنا احنا مثلا :
rx6700 undervolt mining او اكتب Overclock 6700xt for mining
المقاطع لي تشرح العملية هذه متنوعة و كثيرة.

8- تعدين تجّار المخدّرات

تُجّار المخدّرات , الي يحبو يستثمرو 6 ملاين أو اكثر في التعدين , فما معدات اخرين بش تشريهم سي التاجر الموقّر بخلاف انك بش تشري غرافيك كارد اخرين ,
يلزم اختيارك يكون صحيح للغرافيك كارد بش متحطش فلوسك في الهواء , مثلا ما ناخذش كارطة سومها 4 ملاين جديدة وقت لي هي انتاجها ضعيف ياسر و بش تخرج من 'الخدمة التعدينية' بشكل مختصر جدّا , على قريب.
بش تضطرّ تشري قطعة اسمها riser card :

هذه شنو مهمتها بالضبط ؟ مهمتها انك بش تركب فيها الغرافيك كارد و تربطها باليو آس بي مع القطعة الصغيرة اسفل الصورة على اليمين , ثم تركب القطعة الصغيرة في الماذربورد
النتيجة بش تكون هكا :

هذه هي الطريقة الوحيدة بش تنجم تركب اكثر من غرافيك كارد في نفس الماذربورد , الرايزر كارد هذه موجودة في تونس و سومها 3 اشهر لتالي كان 40د , اولاد الحلال زادو سومها حتى ل 60 و 70د , رغم لي هي في aliexpress سومها كان خلات و جلات 5$ , لا علينا
لازم الPSU متاعك يكون فيه منافذ كافية للرايزر كارد و الغرافيك كارد الكل , مثلا , عندك 3 غرافيك كارد , كل وحدا لازمها 2x(6+2)Pin
يعني 3 كوابل كيف لي في الصورة , منفذ يدخل في الPSU و زوز يركبو في الغرافيك كارد

ثم لازمك 2 كيفهم للرايزر كارد , او يكفي الكابل هذا Molex cable , لكل رايزر كارد عندك .

9- كيفاه نركّح الــ Bios ؟

ركبت كوارطك الكل بالصحيح , تمشي تدخل للبيوس متع الماذربورد متاعك , معرفتش تدخله ؟ حل اليوتيوب و اكتب : bios Access و تكتب نوع الماذربورد متاعك
دخلنا للبيوس , فما خاصية اسمها 4G Decoding , تحطها Enabled

ثم تبحث على خاصيّة اسمها : PCIe slot configuration , تلقاها محطوطة Auto , يلزمك تبدلها Gen2 او Gen3

ثمّ سجّل Save و روديماري الحاسوب , و صب الويندوز و كلّ الدرايفر اللازم , لو تفهم لينكس و عندك تجربة كبيرة معاه صبه يكون افضل ,
الدرايفر يكفي انك تحل الويندوز update اتاو يصير الكل بشكل آلي لو متحبش تضيع برشا وقت , المهم يتصب الكلّ
لكن درايفر الغرافيك كارد AMD يلزمك تيليشرجي اخر نسخة موجودة من الموقع الرسمي
AMD Driver Download
Nvidia Driver Download
المهم تثبت من مودال الغرافيك كارد و متهبطش درايفر اخر

10- كيفاه نجبد الفلوس إلّي دخّلتهم من التّعدين ؟
متنجمش تجبد , تنجم تبيع لتوانسة اخرين , سواء بنفس العملة لي تعدن فيها ETH/BTC او تحولهم للعملة الثابتة USDT
هذا الكل يصير في الموقع لي انت تستعمل فيه مثلا: Binance / coinbase ...
اما يبعثلك wallet adress متاعه و تحوّله الفلوس و يسلمهملك بالدينار التونسي الموقّر قدّامك مباشرة
او يكون معرفة و ثقة و تبعثله مباشرة و هو يبعثلك فلوسك عبر تطبيق D17 الخاص بالبريد او بتحويل بنكي او غيره من الوسائل
المهم هذه حاجة انت وحدك تتحمّل مسؤوليتك فيها خاترها حسّاسة للغاية , لكن البيع و الشراء موجود في تونس و في كلّ دول العالم يصير بنفس الطريقة
او تخلّي فلوسك متجبدهمش , و تدخل بيهم لعالم الترايدينغ , و لي الربح الاساسي للمعدنين الكبار في العالم يكون منه

11- بالحقّ التعدين معادش فيه ربح ؟
'الربح' هو الملح في لهجتنا التونسيّة ,
كان ماعادش فيه ربح منوسّعش بالي في الجريدة هذه الكلّ هههه
الكونفيغ لي عملناها مع بعضنا هذه , تجيبلنا في النهار بين 2.5$ـ - 3.5 $ بالأوفركلوك الصحيح للغرافيك كارد
لكن الربح ينقص و يزيد حسب عوامل ذكرتها في اول الموضوع

12- قدّاش يستهلك ضو التعدين هذا ؟
حساب الاستهلاك يكون كالآتي :
بعد ما تعمل الأوفر كلوك للغرافيك كارد متاعك , و تبدأ عمليّة التعدين , بش يظهر في شاشة قدّامك متوسّط إستهلاك الكهرباء للغرافيك كارد متاعك , و لي بش يكون في الحالة متاعنا كمعدّل 130W في الساعة
يعني تقريبا 3120 W في اليوم , يعني 93600W في الشهر , رقم يخوّف للناس لي متفهمش في الكهرباء ههه , و هو في حقيقة الامر مجرّد 93 كيلو ضو , و لي سومهم تقريبا ميفوتش ال15 دينار
هنا بالطبيعة Simulateur Steg تنجم تحط و تحسب فيه استهلاكك بالضبط و تعرف فاتورتك قداش بش تجيك :
Simulateur STEG
في حال عندك اكثر من كارطة , يكفي انك تجمع الاستهلاك تع الساعة الواحدة للكوارط الكل , و تضربو في 24 بش تعرف الاستهلاك اليومي , ثم تضرب في 30 بش تعرف الاستهلاك الشهري
1Kw = 1000 W
يعني في الكونفيغ متاعنا , خلاص الضو متاعك يتمّ بالضبط بعد نهارين تعدين فقط كأقصى حد , الباقي الكلّ ربح صافي ليك .

سامحوني طولت عليكم كالعادة , نشوفكم بخير في موضوع آخر