(*_*) زرزوميّة كلات حنش (*_*)

شوفو التّوقيت وخيّاني ، والله توّة كي روّحت مالرّبعي مسموط في ڨـلّالة موش مشكل ...
تمشيش تقولو فُخرة والسيّد ... نحاس ؟

واللّه الكريم زوّالي في حالي ...

الكورونا أو ما اصطلح عليه علميّا بكوفيد 19 سوى كان ابتلاء من عند المولى سُبحانو أو هو فايروس مصنّع داخل المختبرات بنيّة مبيّـتة للتقليل من عدد البشر اللّي استنزف أغلب موارد الأرض بجشعو وسوء تدبيرو ، ما هوشي هذا موضوعنا اللّي يطول شرحو وتتصادم فيه الآراء وتختلف حولو وجهات النّظر .

ثمّة صفة في تونسنا البيّة يتّصف بها السواد الأعظم من مسؤولي دولتنا المَصون وما يختلفوش في معرفتها وتحديدها اثنين ، زعمة طلّعتوها ؟

إي نعم ،

هاذيكا هي اللّي في بال كلّ واحد فينا يعيش في ها الرّقعة الترابيّة ويعيش مع مسؤولي دولتها ويأتمر بأمرهم ...

صفة

اللّامبالاة وما أدراك ما اللّامبالاة !!!

يقول القايل آش وصّلنا لها النتيجة الكارثيّة في خصوص انتشار عدوى الكورونا من بداية ها الجائحة لحدّ السّاعة والخسائر البشريّة اللّي تكبّدناها ؟

نقولّك سيدي خويا اللّي راهو عندنا حكومة

رعوانيّة ، قرارات المتنفّذين فيها لا تُراعي لهذا الشعب ظروفا ولا يرقبوا فيه إلاّ ولا ذمّة تقول كبش فرناني كان مڨـزون سنين وتسيّب على رِسلة متاع غنم في أرض الله الواسعة ، شاطح باطح !!!

لا بُنية تحتيّة باهية في ها البلاد ، لا سبيطارات مجهّزة بما يستلزم فيها من تجهيزات طبيّة باش تقاوم ها الجائحة ، لا تدابير صائبة باش عالقليلة تحمي أفراد الشعب وتحدّ من انتشار هذا الوباء بين النّاس ، تي حتّى اللّقاح جابوه امخّر وبأعداد جُرعات تغطّي عدد متفرّجي ستاد زويتن !

اللّامبالاة بحياة النّاس اللّي ربّي سُبحانو وهبهالهم !

تي ثمّة ناس ما خلطتشي على قدمة خبز يسدّ بها رمقو من الجوع خلّي باش يخلط على كمّامة ودبوزة جال !

علاش المسؤولين في الدّولة ما فكّروش في ها الفئة الهشّة من النّاس ؟

علاش يزيدو يُمقطو الشعب بعركهم ومعروكهم نهار كامل تحت قبّة مجلس نوّاب الشعب بتهريج بعض أفرادو على مرآى ومسمع الجميع وأفراد الشعب قاعدة تموت نتيجة

اللّامبالاة وتقصير المسؤولين في حقّو ؟

اللّي باش يقولّي حتّى الشعب في عُمومو زادة يحمد ربّي ويتحمّل جزء كبير مالمسؤوليّة ، نقولّو صحيح وهذا ما يخفى على حدّ ، أما الشعب راهو كيف هاك الولد الصغير كيف ما يلقاش والدين صالحين يخمّمو فيه ويرعاولو شؤونو ويوفّرولو مستلزمات العيش الكريم آش تحبّو يعمل ؟ النتيجة محسومة ومعروفة مُسبقا .

يا مسؤول عشتش عمرك 17 عام تقعد في حانة Le café de paris وقاعد بين أصحابك وفوقك حقّ ستّة كعبات بيرّة و 90 فرنك حقّ المرواح في الكار وانت تبدا تترشّف في السّادسة لخّرانيّة ويجي خونا الطيّب أكبر منّا عمُر وساقيها وقتها في الرّكاب ويبدا يحبّ يتمزّى ويهبّط البيرّة للقاعدين باش يذلّهم بعد بيها ويسيّب العُقد متاعو على الخلق وينفّس على كَربو على حسابهم ؟ والله ما يراها أوفى ( انتهى ) شُربي نطير ولا نخلّي ولد أمّو يعمل عليّ مزيّة باش يمركي على حسابي بونتو !!!

والله الكريم تعلّمت الشراب قبل بعام ، عُمري 16 ، نُشرب كعبة بوخُبزة وكعبة grande canette وفي L'octave متاع الوقت هذاكا بخلاف السّلام عليكم وتصبحو على خير ما نتكلّم شيئ ، تلقاني نسمع آكاهو ، آش نسمع وقتها ؟ نسمع في قسوات غيري النّاس الكبار (

الله يرحمهم ) وفايتيني ببارشة تجارب وهمّ ، ونتألّم في داخلي ونقول شوف الرّجال يا محرز آش تقاسي وآش تعاني بالرّغم أغلب التجارب آذيكا ما نعرفهاش وما شُفتهاش للحظة هاذي ؟

يا مسؤول انت عِشت وقت اللّي ناب عليّ ربّي وتوظّفت عمري 20 سنة في عهد بورڨـيبة 159 دينار وقايم بيها روحي بعمّاري ونعطي منها للوالديّ باش ياخذو بيها ياجور وسيمان وحديد وجورناطة بنّاي وصنّاعو باش يهدّو الحوش ويبنيو بيها دار تليق بمقام سُكّانها بين العباد وكي العباد ؟

يا مسؤول يا فهيم عِشت وانت مازلت تقرا في طمبك صغرك وتخدم في حانوت صبابطيّة وتتعلّم في صنعة باش يمدّولك في آخر السّمانة ( الجمعة ) خمسة دينارات وراهم جابو عليك الحجر كلّ يوم من شريان الـ programme متاع الزّوايل لين وصلت نعطيهم 3 أو 4 أو 5 خمسة زوايل حسب الـ programme والـ pronostique اللّي نترجمهلهم ماللّغة الفرنسيّة للعربيّة ؟

يا مسئول والله لما نكتبهالك برسم أهل المشرق على النّبرة ياخي عشت صُغرك محروم مالبحر والدّوليش في الصّيف مَڨـزون في حانوت صبابط باش توفّر ملاليم تسلّك بيهم حياتك ؟

والله الكريم الحنين لا عشتها ولا شُفتها ولا وصلت سمت واحد يحكيلك عليها !

على خاطرك حڨّار وفرخ بوماضة كيف ما يقول خويا وحبيبي كمال @vermaelen ...

هذا البعض البسيط من تجاربي الخاصّة اللّي عايشتها في حياتي ومن غير ما نحكي على اللّي عايشتو مخُبّي لو كان نحكيه تاو برشة يكذّبوني ...

بخلاف آش سمعت من حكايات غريبة وعجيبة متاع الجيل اللّي أصغر منّي آش يقاسيو مساكن ، نسمعهم ونفهمهم وكيف يساعفني الرّحمان ننصحهم ونعاونهم باللّي نقدر عليه ...

والله لا تُسمُرها جِملة وحساب ...

وفي وقت معيّن ( ما نغير ما نسبّو الوقت ، أعوذ بالله على خاطر الوقت والدّهر هو ربّي حبيبي وخالقي ومولاي سُبحانو )

يجي فرخ بوماضة يُحكم فيّ ويقرّرلي مصيري !!!

آذاكا علاش الزرزوميّة وصلت في بلادنا كلات حنش وحديثنا قياس وإلاّ حصيرة برّا كسّر عمّارك ... أمورك .

سامحوني وخيّاني كان طوّلت عليكم بالهَدرة تقول كاتب عريضة لوكيل الجمهوريّة نشكي فيها بهَمّي ...

الله غالب الشيخة تُحكم .

يا عمّار سيّبنا مالشيخة ، الحمد لله نعيشو في تونس موش في قطر وإلاّ راهي الشيخة موزة رِفدِتنا في أنتراكتيكا ( يقولو وراء الشّمس في الأرض الكرويّة الشّكل ) ...

​