تم تعطيل الجافا سكربت. للحصول على تجربة أفضل، الرجاء تمكين الجافا سكربت في المتصفح الخاص بك قبل المتابعة.
داوود 1974 ، في بداية السنة الدّراسيّة لسنة 1974 نقرا خوكم في القسم الثّالث ابتدائي ، قعّدو بحذايا في أوّل الفصل الدراسي أو الصفّ تلميذ جديد اسمو داود ، ضميّم في بدنو ، قصير ، صوتو جويّد ، شباب في وجهو وشعرو أرطب وأكحل وعينيه غنُج ، أحلى طبليّة لابسها وأحلى حوايج ( دبش ) لابسو وأحلى صبّاط كيف كيف ، الولد ضحّاك ومِشرَه وآش ما جاء يشيخ عليه ضُحك ...
في ظرف ستّة شهور عمري لا شُفت على صُغر سنّي الوقت هاذاكا تقريبا 10 سنين إنسان متربّي وتلقائي ( يعطّلي خويا مِحرِز ) وضحّاك وقليل حديث كيفو ، والأهمّ ذكيّ وموهوب بارشا ، والله قهرني على الرّغم في القسم الأوّل والثّاني كنت الأوّل في القسم متاعي وبمعدّل يكاد يكون ... آش علينا !
مالآخر ولّى هو اللّيدر متاع التلامذة في القسم بذكاه وتُربيتو ، عربيّة وفرنسيّة ( للّي ما يعرفوش ، في الحِقبة هاذيكا نقراو اللغة الفرنسيّة مالسّنة الثانية ابتدائي ) خوكم قدّ ما حاولت ننافسو قهرني بذكاه الوقّاد وسُرعة بديهتو ...
الثلاثيّة الأولى هو الأوّل متاع القسم كمعدّل والعبد لله الثّاني .
الثلاثيّة الثّانية كيف كيف بعد ما خذينا الكارنيّات .
بعد الصّلاعة الثانية رجعنا نقراو باش نطاكيو الثلاثيّة الثّالثة ، التلامذة الكلّ موجودين وما شفتش
داود بحذايا في الطّاولة !!!يِعلمنا معلّم حِصّة العربيّة وأنّو
داود توفّاه الأجل المحتوم في الصّلاعة على خاطرو مريض بالقلب وما عادش باش نشوفوه معانا مستقبلا !!!ستّة شهور عِشرة ونقعدو فَرد طاولة ، ستّة شهور منافسة وهو ديما غالِبني ، ستّة شهور والعبد لله كاره روحي على خاطرني ما ڨـدّيتوش ، الله غالب أقوى منّي ...
بكلّ صدق كي سمعت الخبر خوكم تخلّطت عليّ المشاعر حينذاك ، نفرح وإلاّ نحزن وسبّقت الفَرح على الحُزن على خاطر انزاح البُعبُع اللّي كان مضيّقهالي وسابقني ، وفي نفس الوقت حزنت على صديقي ومُنافسي
الله يرحمو ...مشات أيّام وسنين وتعدّات على راسي تجارب بباهيها ومحانها وللحظة هاذي عمُرها لا فارقت خيالي ضحكة
داود السّوفي الدّزيري ( أولاد سوف ) ...في المحصّلة ومن غير ليه ، كيف حبّيت نعمل عضويّة ثانية والعبد لله عندي عضويّة إداريّة ما جاء في خاطري حتّى اسم غير خويا داود ( ربّي سُبحانو بحِكمتو ورحمتو اصطفاه عندو وعمرو 10 سنين ) ، العبد لله زدت واو في وسط اسم العضويّة ( داوود ) لغاية ما يعلمها كان مولايا الكريم ...
مبروك عليك وخيّتي الغالية ترشيحك للإشراف وإن شاء الله تقدّم الإضافة لدينامو المنتدى " قسم التسالي " ...
الله غالب موضوعي اليوم تراجيدي شويّة ، آما وراس وخيّتي الغالية لا لقيتلو قسم في المنتدى يجي فيه !
على كلّ نتمنّى ما يضيقش صدركم بخوكم
محرز بالعضويّة هاذي الجديدة ...للجميع دون استثناء تحيّاتي وتقديري .
Enregistrer un commentaire