مشاكل الأسرة ما تتحلش على شبكات التواصل الإجتماعي.

ريت مرا مهبطة إستشارة في الفيسبوك أنو راجلها يربي في الدجاج و تعبت من الوسخ و البعبش .
------هذا نص الإستشارة---
بربي عيشكم انصحوني راجلي مغروم بالدجاج عركنا الكل عالدجاج الريحة والوسخ وزيد ضربة ثنين عامل البغبش حرت الأساليب الكل عملتها نعرف اللي حرام اما نفكر نحطلو الدواء نقصد الدجاج خليه يموت باش ماعادش يربي حتى دجاجة راني فكرت نشكي بيه لكن مايجيش زعمة نتخلص من الدجاج هكة دلوني راني كرهت عيشتي بربي دبرو عليا.
---------
في المنتدى مرة ولد عمتي عروسية قال الي تربية الدجاج موش مشروع باهي في المدينة خاصة وفعلا عندو الحق خاطر ثمة إزعاج للجيران و زيد مع ضيق المحل يسبب برشا مشاكل .
ملاحظتي أنو في الفيسبوك الناس تسخن الطرف الي يقدم إستشارة و زيد ما نسمعوش الطرف المقابل الي ينجم يكون متفهم وزيد الاغلبية تحرض على الطلاق و خراب البيوت ...
وفي العلاقة الزوجية كل واحد يحاول يحترم الآخر وما ينغصش عليه عيشتو ،خاصة إذا حاجة فيها قلق واضح .
شنوا رايكم في اللجوء للفيسبوك لفض المشاكل الأسرية؟