السلام
مقال للنقاش بين طبقتين...المناسبة زوز اعراس ...الاول في جعفر طريق رواد في بطحة...الثاني اللاك 1 قاعة افراح...
.............
العرس الاول
.....
قبل شهر العريس يبدا يدور بالاستدعاءات ...يعرض ويؤكد عليك كايننو فينال رابطة الابطال .....ويبدا العريس يجري ويلهط...جيب الشان....جيب الكراسي...والطباخ والماعون والطناجر ...بلاتوات بلاستيك مدعمة بصحون بلار شطرها يغبر بالتكسير....
ليلة العرس تستنى ساعتين باش تتعشى ...سلاطة مشوية حارة ...ولحمة شطرها عظم....وكاس ماء تقولش عليه م الڨلتة....
تكمل العشاء تمشي للبطحة وبرا لوج على كرسي...الكراسي بالمعارف ....وقريب تدفع رشوة ....النساوين امورهم واضحة ....
يبدا طرح الفرقة ...ما تفهم حتى كلمة م المغني ...لا تعرفو يغنني ...يسب..يقرا في كتاب اولى اساسي.....ويبدا راسك يتنفخ ...
بعد ساعتين م الزرنة ....يبدا الرمو ....ويبدا التدافع معلى "كسرونة " الرمو....واللي يشد الميكرو ....يبدا عاد ....اللص ولد علي شراب..30د يفرح ويولولو....انيس في علجية 20 د يفرح ويولولو...وها الالقاب الكل تتجبد ...وزيدها ريحة الشراب والصنان م التدافع...
ونهاية المطاف عركة على كعبة ....بيرة...ولد شهلة يشلط ولد الجزار ....ويهد الحاكم
من غدوة يعرضك بو العريس يقللك اشبيك ما جيتش....وتبدا تحلفلو اللي انت جيت بامارة كذا وكذا...
.......
العرس الثاني....اللاك 1
الساعة قبل ما توصل للاك 1 ...تجيك نسمة بحر باردة تنعوش الروح.....توصل لقاعة الافراح ...وهاكا الاستقبال الرائع
--تفضل خويا...انت من اهل العريس...تفضل تفضل ....من هوني....ويجبد الكرسي ويقللك تفضل اقعد ....طاولة مزخرفة وسطها بوكي نوار ...وكيسان مزيانين....وموسيقى هادئة ...درجين يجيك طبق حلو ....بالحرام لا عرفت اسمو ولا ذقتو قبل في عمري....
ويبدا اهل العروس يجو يسلمو عليك ...مرحبا بيك خويا الغالي ...ربي يباركلك كي شرفتنا....وكلام منمق متاع شعراء....
نتلفت في الصالة نلقى صور ....زازا...بلطي ...جرمانة...وبرشا فنانين ....وهاكا الرونق متاع منصة العرايس....يشهيك في عرس ثاني....
يجيك العريس ...يسلم عليك ويفرح بيك ...ويسهلك اش ناقصك ...
لا هرج ولا مرج ...ولا يضيعلك ولدك ...ولا يتكسر صحن ...ولا سلاطة مشوية حارة...ولا والو...حلويات راقية قد شهريتي...تاكل وتتبنن ....
وكي تجي مروح ...تقول من بعيد باي باي للعريس للي يضحكلك بدوره ...وتقصد ربي لدارك مخك مرتاح ....وزيد تعبي رواريك بهواء نظيف....
.........
هذي مقارنة خفيفة لزوز اعراس عشتهم....
احكولنا على اعراسكم وطرائفهم ....
......
سلام
إرسال تعليق